Venti de fasismo in itałia. Forsa, demose da far par ła nostra independensa. In presia.
Venti de fasismo in itałia.
I fati de ancuò dei tifoxi a Roma, Miłan e Bergamo xe ła dimostrasion che xe a ris-cio na deriva balcanica dei tałiani.
Naltri veneti dovemo far come ła Slovenia che xe stada ła prima a łasar ła ex Jugoslavia.
No dovemo farse strasinar inte sta situasion che scumisia a spusar asè.
Scumisia sofiar venti antidemocratici inte sto stato ormai meso mal.
Da on ponto de vista economico ghe xe restà solo che Venetia e Lombardia, el resto xe dexerto, crixi bruta, conprexe Emilia Romagna e Piemonte.
Ła crixi bruta no ła xe lontana da rivar anca qua, ma fora da qua se sta faxendo un mucio de pasi indrìo e anca in presa.
I sintomi xe evidenti: i giornałi i buta fore pagine e pagine de notisie inutiłi de cronaca nera. Le forse połitiche tałiane łe serca de tornar indrìo al sistema proporsionałe dei ani ‘80. No łe riese pì a goernar i fenomeni e łe se sera a ricio nel so paradixo dorato de casta, łasando el stato ndar a ramengo del tuto. I discorsi da duce de Storace e łe ultime poxision de Amato no łasa sperar gnente de bon da sta xente qua.
Parlando in giro ghe xe preocupasion sul futuro. Preocupasion alimentada sicuramente da na congiuntura finasiaria internasionałe altamente instabiłe. Inte sti do dì alcune tra łe pì inportanti banche mondiałi gà trabałà e ancora el minueto no xe finìo. Ła crixi dei mutui mericani se sta spostando inte na crixi asè seria del mercato imobiliare. El mercato imobiliare se strasina drio banche, fameje e tante tante inprexe grandi e picenine.
Tornando a naltri, ła situasion sta prexentando dei ris-ci dovui ai colpi de coa del sistema połitico-clientelare che ne tien ingabiai. Forsa, demose da far par ła nostra independensa. In presia.
Posted: Novembre 11th, 2007 under temi veneti, tristese.
Comments: 4
Comments
Comment from vutu vedar che xe el Leon
Time: Novembre 12, 2007, 12:10 pm
Mi spero tant che i Veneti i se accorxe tuti che l’aria dentro la peniso£a ‘taliana la xe drio cambiar de bruto e i fati de violensa i xe sempre pi cuotidiani.
Anca par mi la pignata ‘taliana la xe in gran boio e fra poc la s-ciopa…, e a£ora xe mejo par tuti noaltri Veneti che se metemo a pensar de trarse fora prima posibi£e sensa scotarse, come gà fato la Slovenia.
Disemoghe a Roma che noialtri no vo£emo pì zogar a ’sto zogo al masacro, ma vo£emo cavarghe el disturbo e rangiarse da so£i co’ l’indipendensa e me par che cuando ghe xe tanti vodi de potere e tant casin par ogni logo, saria propio el momento giust de mocarsela, o par caso vo£emo spetar che rive i po£izioti rumeni…????
Vanti co’ l’indipendensa, tosi…!
Comment from claudio
Time: Novembre 13, 2007, 10:47 am
xe vero, xe drio n’dar tuto in mona.
Biogna che el veneto el se smarca in presia da sta smarza de italia tegnù in piè da politici e governanti meridionali. Boni solo a rubare e delinquere.
Vojo esere mi a decidere el futuro mio e dela me fameja…
Comment from Claudio G
Time: Novembre 17, 2007, 12:34 am
A so restà co go vedesto la tranxmision de Annozero ieri sera, co on amigo. I xera partesti dal calcio, coi fati de deso, e i xe nda a cascar tirando fora i fati de sie ani fa del G8 de Genoa. Se vole sviar la xente dal problema principal?
Comment from raul
Time: Novembre 26, 2007, 12:56 am
bisogna ke xe sveje fora anca i nostri imprenditori e industriaj, el federaismo fiscae i faria presto a farlo, xe invexe de vardarse xolo le xo scarsele i asumese xente che xe ani ke la sta quà o ke la crea economia in veneto es: i ga comprà la casa o i xe ani ke i lavora da noaltri e i xe ga inserj co la nostra coltura; invese de darghe laoro a sti clandestini o malviventi che i ghe dà 850€ e nesuni va vardar come ke i fà a pagar l’afito e a mantegner du o tri fioj.
a me son sposa in otobre e a me mojer ke la xe vegnu a vicensa da verona i fa fadiga a darghe un laoro parkè la ga 31 ani e i dize ke la vol rimanere in cinta e tute le so storie, anca vere ma se no la laora come femo a metare al mondo na creatura? e invese no i xe fa problemi a asumare tuta sta xentaja ke dopo i ghe fà minimo du misi de mutua al’ano, forxe ghe sta anca ben…. i ghe da un c… de stipendio.
xe nel veneto xe svejaxe fora quj ke ga i schej penso ke saria pì faxile anca aver l’indipendenxia, ma go paura ke i xe come quej da Roma, me nono me dixea sempre:”la pansa voda no capixe quea piena”
Write a comment